Breaking News

औरंगाबाद जिल्ह्याचे कुलदैवत म्हैसमाळची गिरिजामाता


महेशमाळ किंवा म्हैसमाळ हे औरंगाबाद जिल्ह्यातील प्रसिध्द असे पर्यटन स्थळ व धर्मिक स्थळ आहे. जिल्ह्यातून तसेच परदेशातून अनेक पर्यटक येथे पर्यटनासाठी येतात. सभोवतालचा शांत व निसर्गरम्य परीसर तसेच हे ठिकाण उंचीवर असल्यामुळे येथुन दिसणारा निसर्गाचा चमत्कार पाहण्यास पर्यटक उत्सुक असतात. म्हैसमाळ ला जातांना आपल्याला गिरीजामातेचे मंदिर लागते. म्हैसमाळची गिरिजामाता ही औरंगाबाद जिल्ह्याचे कुलदैवत म्हणून प्रसिध्द आहे. मोठया प्रमाणावर भाविक येथे आपला नवस पुर्ण करावयास येतात. नवसाला पावणारी अशी ही गिरिजामाता.

मंदिराचा जिर्णोध्दाराचे काम आता पुर्णत्वास आलेले आहे. येणार्‍या भविकांसाठी राहण्याची उत्तम सोय मंदिराच्या ट्रस्ट च्या वतीने आता करण्यात आली आहे. नवराञीच्या वेळेस येथे मोठी याञा भरते व आजुबाजुच्या शहरातून भविक येथे दर्शनासाठी येतात. गिरीजामाता हे माता पार्वतीचे रूप आहे. गिरीजामातेविषयी उपलब्ध पुराव्यांनुसार कथा पुढीलप्रमाणे आहे.

एके दिवशी आनंदवनात शिवपार्वती सारिपाट-सोंगट्या खेळत असताना पार्वतीने शंकराचे सर्वकाही जिंकून घेतले. शंकराची लंगोटीसुद्धा पार्वतीने जिंकून घेतली. या घटनेवरून नारदाने भगवान शंकरास चिडविले. त्यामुळे भगवान शंकरास राग आला. रागाच्या झपाट्यात ते काशीतून निघून उत्तर किनार्‍यावरील महेशर मौळी (म्हैसमाळ) महेशमाळ येथे येऊन राहू लागले. भगवान रागाने निघून गेल्यामुळे माता पार्वती विवंचनेत पडली. शोधाशोध करूनही भगवान सापडत नसल्यामुळे त्यांनी नारदाकडून त्यांचा वास कोठे आहे, याची विचारणा केली, तेव्हा त्यांनी सांगितले की, विश्‍व काम्यक वनात तप करीत बसले आहेत. तेव्हा येथे जाऊन आपण याच अवतारात गेल्यास शिव पुन्हा रागावतील म्हणून पुन्हा वेगळे रूप घेऊन तेथे जावे, असेही सुचविले. मग माता पार्वतीने भिल्लीणीचे रूप घेत मोरपिसांचे कपडे घातले, धनुष्यबाण घेतला, डोक्यात केवडा, डोक्यावर मुकुट घातला, डोळ्यात काजळ, तसेच तोंडात पानाचा विडा घातला, असा सर्व शृंगार करून काम्यक वनात जाऊन शिवासमोर नृत्य गायनास सुरुवात केली. त्या गायनाने शंकराचे ध्यान भंग झाले अन् ते तिच्या मागे जाऊ लागले. शिवाच्या मनात काम उत्पन्न होऊन तिच्याशी बोलण्याचा प्रयत्न करू लागले. पार्वती उत्तर न देता पुढे चालू लागली. भगवान शंकरही तिच्या मागे जाऊ लागले. फिरून-फिरून शिव दमले व पार्वतीही थांबली. यावेळी शिवाने रतिसुख देण्याची विनंती केली, तसेच कैलासाचे ऐश्‍वर्य देण्याचे कबूल केले. तू कैलासावर माझी पत्नी म्हणून राहा असे सांगितले. शिवाने अनेक प्रकारे विनंती केल्यावर त्या म्हणाल्या की, तुम्ही अति रागीट आहात. सर्व देवांना मान्य अशा पार्वतीचा त्याग केला. तुमचा स्वभाव तापट आहे. तुम्ही माझा पण त्याग कराल, तेव्हा असे करणार नाही असे वचन द्या. शंकराने भिल्लीणरूपी पार्वतीस वचन दिल्यावर पार्वती मातेने भिल्लणीचे रूप टाकून मग त्या भगवान शंकरास म्हणाल्या. आपण खेळताना माझ्यावर रागावला म्हणून मी हा डाव रचला. 

मी डाव जिंकला हे म्हणण्याची चूकच होती. तेव्हा आपण मला क्षमा करावी, असे म्हणून ती शिवाच्या पाया पडली. शंकराने प्रसन्न होऊन प्रेमालिंगन दिले. तेव्हा देवांनी पुष्पवृष्टी केली. ते दोघे रतिक्रीडेत रममाण झाले. तेव्हा पार्वतीने शंका काढली. येथे कोणी पुरुष तर येणार नाही ना, तेव्हा भगवान शंकराने संपूर्ण वन शापित केले की, जो पुरुष येईल तो स्त्री होऊन जाईल.

त्यामुळे सूर्यवंशीय सुधन्वा राजा शिकारीनिमित्त काम्यक बनात आला असता तहान लागल्यामुळे पाणी पिण्याकरिता तो त्या ठिकाणी गेला तेव्हा भगवान शंकराच्या शापामुळे तो स्त्री झाला. तेव्हा चंद्राचा पुत्र बुध हा त्या स्त्रीरूपी सुधन्वा राजास आपल्या सोबत घेऊन गेला. नंतर बुधास त्या स्त्रीरूपी राजापासून चार मुलेही झाली. कालांतराने ऋषी वशिष्ठांनी स्त्रीरूपी राजास त्याची खरी स्थिती सांगून शापमुक्त होण्याकरिता शिवाचे ध्यान करण्यास सांगितले. शिवाने प्रसन्न होऊन तू पुरुष होशील असा वर दिला. पुढे सुधन्वा राजास पुत्र झाला. त्यामुळे सूर्यवंशाचा विस्तार झाला. पुढे सुधन्वा राजाने आयुष्यभर शिवाचे ध्यान केले. शिवाने प्रसन्न होऊन त्यास वर दिला की सरिताचे रूप घेशील. तुझ्या आशीर्वादाने ब्रह्मचारी उद्धारतील. मग इळागंगा (आजची वेरूळची येळगंगा) रूपाने पृथ्वीवर अवतरला. अशा प्रकारची कथा काशीखंडामध्ये आढळून येते. काम्यक वनात शिवाचा वास असताना शिव जवळच्या लामणगाव परिसरात तप करीत बसले होते. तेथे आजही शिवाची मोठी पिंड असून त्यास लांबेश्‍वर असे म्हणतात. 

पृथ्वीचे काम्यक वन म्हणजेच आताचे महेशमाळ (म्हैसमाळ) परिसर शिवपार्वतीच्या वासाने पवित्र झाले आहे. येथेच माता पार्वतीचे रूप म्हणून गिरिजादेवी आहे. नवरात्रनिमित्त येथे मोठय़ा प्रमाणावर धार्मिक कार्यक्रमाचे आयोजन केले जाते.

=================================
All above content are copyright of respected owner we share just link and brief information.
ADVERTISE WITH US !!!! 
- Thanku for Visiting http://www.aurangabadtravel.info 
- Join our Facebook Page https://www.facebook.com/Aurangabad.City.Of.Gates 
- Publish your unique Travel articles send them to ctindia2009@gmail.com 
- Advertise on This website contact ctindia2009@gmail.com 
- READ RELATED POST CLICK BELOW LINK

No comments